.. ..
العشك يسري بحنايا الروح
و من شفتك حبيب الروح سميتك
حسيتك قريب و اغلى كل الناس
و لا جنك غريب و هسه لاقيتك
و مو سكته و دفن حبيتك و
كل الناس تدري بيوم حبيتك
بس تبقى لغز ما تنكشف للغير
يروحي بروح روح الروح ضميتك
ضميتك و اغار من الهوا يحاكيك
و من كد ما غرت ما يوم حاكيتك
يا نسمة هوا شمدريني راح اهواك
قلت مثل الهوا و ما ادرري شميتك
من ذاك الوكت ما غبت عن البال
القلب بأسمك تسجل و انحسب بيتك
يا نبعة ورد ما بيك نتفة شوك
ناعم يزهي لونك و العطر صيتك
فصلت البشر سويتهم تمثال
و انت الروح بالتمثال خليتك
حجر كل البشر بس كامو يحنون
قطرة نطيتهم من بحر حنيتك
يا نهر العشك يا سلم الافراح
عطشان و حزين و واكع و جيتك
رايد كلمه منك مو كلام هواي
و اذا انت تريد الروح لبيتك
بس كلمة احبك كافي عاد ارجوك
حت لو بالكذب بس كول حبيتك
